جامعہ ہذا  نے طلبہ کو دینی تعلیم کے ساتھ عصری تقاضوں سے روشناس کرانے کے لیے امام ولی اللہ پبلک اسکول قائم کیا۔ اس اسکول میں پہلی سے دسویں جماعت تک تعلیم کا جامع اور منظم نظام رائج ہے۔ نصاب میں اردو، انگلش، ریاضی، سائنس اور سماجی علوم جیسے اہم مضامین شامل ہیں تاکہ طلبہ کو بنیادی عصری تعلیم معیاری انداز میں فراہم کی جاسکے۔ اسکول کی سب سے بڑی خصوصیت یہ ہے کہ یہاں نصاب کے ساتھ ساتھ اخلاقی تربیت اور دینی شعور پر بھی خصوصی توجہ دی جاتی ہے، تاکہ طلبہ ایک متوازن شخصیت کے ساتھ میدانِ زندگی میں قدم رکھ سکیں۔ غیر نصابی سرگرمیاں جیسے تقریری مقابلے، کھیل کود اور تعلیمی مشغلے طلبہ کی صلاحیتوں کو نکھارنے میں اہم کردار ادا کرتے ہیں۔ الحمدللہ! ماہر اور محنتی اساتذہ کی ٹیم کی بدولت اسکول معیاری تعلیم و تربیت کا بہترین نمونہ پیش کر رہا ہے اور اپنی خدمات میں روز افزوں ترقی کر رہا ہے۔

جامعہ ہٰذا میں طلبہ کی عصری ضرورتوں کو پیش نظر رکھتے ہوئے کمپیوٹر لیب قائم کی گئی ہے، جہاں باذوق طلبہ کو باقاعدہ MS-CIT کورس کروایا جاتا ہے۔ اس کورس میں طلبہ کو کمپیوٹر کی ابتدائی تعلیم سے لے کر ایڈوانس لیول تک کی مہارت سکھائی جاتی ہے، تاکہ وہ زمانے کے بدلتے تقاضوں کے مطابق عملی میدان میں خود کو ثابت کر سکیں۔ لیب میں جدید کمپیوٹرز اور تمام لازمی سہولیات فراہم ہیں، جن کی بدولت طلبہ نہ صرف نظریاتی معلومات حاصل کرتے ہیں بلکہ عملی طور پر مختلف پروگرامز اور ایپلیکیشنز پر کام کرنے کی مشق بھی کرتے ہیں۔ یہ کورس طلبہ کی ذہنی صلاحیتوں میں نکھار پیدا کرتا ہے اور ان کے مستقبل کے لیے بہتر مواقع فراہم کرتا ہے۔ امتحانات میں کامیابی کے بعد طلبہ کو سرکاری طور پر منظور شدہ سند بھی دی جاتی ہے، جو ان کے لیے اعلیٰ تعلیم اور عملی زندگی میں مفید ثابت ہوتی ہے۔