دینی تعلیم

اللہ رب العزت کا اپنے بندوں پر یہ عظیم انعام ہے کہ اس نے اپنا مقدس کلام قرآنِ مجید نازل فرمایا اور اس کی حفاظت کی ذمہ داری بھی خود لی، جیسا کہ ارشاد ہے: اِنَّا نَحْنُ نَزَّلْنَا الذِّکْرَ وَاِنَّا لَہٗ لَحَافِظُوْنَ (الحجر: ۹)۔ اللہ تعالیٰ نے قرآن کی حفاظت کا ذریعہ حفاظِ کرام کو بنایا، جو اس عظیم امانت کے امین ہیں۔ اسی مقصد کے تحت جامعہ نے شعبۂ تحفیظ القرآن قائم کیا ہے، جو دس درجات پر مشتمل ہے۔ اس کی نگرانی کے لیے دس ماہر اور تجربہ کار اساتذہ کی خدمات حاصل ہیں۔ طلبہ کو تجوید کے ساتھ قرآن حفظ کرایا جاتا ہے اور جلد پارہ مکمل کرنے والے طلبہ کو انعامات سے نوازا جاتا ہے۔ مزید بہتری کے لیے ہر طالب علم کے پاس روزانہ اسباق کی کیفیت کی کاپی رکھی جاتی ہے، جس سے انفرادی جائزہ اور امتحان لیا جاتا ہے۔ اسی منظم نظام کے ذریعے طلبہ کو مضبوط بنیادوں پر قرآن کریم کا محافظ بنایا جاتا ہے۔

قرآنِ مجید کو درست طور پر پڑھنا ہر مسلمان پر لازم ہے اور اس کی ادائیگی تجوید کے اصولوں کے بغیر ممکن نہیں۔ اسی مقصد کے تحت جامعہ ہٰذا میں شعبۂ تجوید و قراءت قائم کیا گیا ہے، تاکہ طلبہ قرآن کو صحیح مخارج، صفات اور قواعد کے ساتھ پڑھنے پر قادر ہوں۔ اس شعبہ میں ماہر اساتذہ کی نگرانی میں رواں سالہ نصاب مرتب ہے جس میں طلبہ کو قواعدِ تجوید کی باقاعدہ تعلیم دی جاتی ہے اور عملی مشق کے ذریعے قراءت کو مضبوط کیا جاتا ہے۔ نیز یہاں قراءتِ حفص عن عاصم کے ساتھ دیگر قراءتوں کی بھی بنیادی تعلیم دی جاتی ہے، تاکہ طلبہ قرآنِ کریم کو حسنِ صوت اور صحیح تلفظ کے ساتھ پڑھنے کے اہل بن سکیں۔ طلبہ کی کارکردگی جانچنے کے لیے وقتاً فوقتاً امتحانات اور مشق کے خصوصی پروگرام منعقد کیے جاتے ہیں۔ الحمدللہ! اس شعبہ سے فارغ ہونے والے طلبہ اپنی اور دوسروں کی تلاوت کو درست کرنے کے قابل بن جاتے ہیں اور دین کی خدمت میں نمایاں کردار ادا کرتے ہیں۔