تربیتی سرگرمیاں

جامعہ کے بنیادی مقاصد میں سے ایک یہ ہے کہ یہاں سے تعلیم پانے والا ہر طالب علم محض ایک عالم و مدرس ہی نہیں بلکہ ایک فصیح و بلیغ مبلغ اور بہترین خطیب بھی ہو۔ جو قرآن و حدیث کے معانی و مطالب کو سادہ اور مؤثر انداز میں بیان کر سکے اور ہر میدان میں قوم کی رہنمائی کا فریضہ انجام دے سکے۔ اسی مقصد کے تحت جامعہ نے "انجمن اصلاح البیان” قائم کی ہے۔ اس انجمن میں درجاتِ عالمیت، حفظ و ناظرہ کے طلبہ شریک ہوتے ہیں۔ وہ اپنے ذوق و شوق سے منتخب کردہ موضوعات پر محنت اور مطالعہ کرکے تقاریر تیار کرتے ہیں اور انہیں بروز جمعرات بعد نمازِ مغرب پیش کرتے ہیں۔ یہ مشق ان کی خطابت کو نکھارتی ہے، خود اعتمادی پیدا کرتی ہے اور مستقبل میں بہترین مبلغ و مقرر بننے کی راہ ہموار کرتی ہے۔ الحمدللہ! یہ انجمن جامعہ کے طلبہ کی عملی تربیت کا مؤثر ذریعہ ثابت ہو رہی ہے۔

جامعہ اسلامیہ دارالعلوم سونوری میں قائم مجمع حکیم الامّت طلبہ کی دینی، علمی اور فکری تربیت کا ایک فعال شعبہ ہے۔ اس کا مقصد طلبہ کی پوشیدہ صلاحیتوں کو اجاگر کرنا اور انہیں علمی و لسانی میدان میں مہارت عطا کرنا ہے۔ شعبے کے تحت عربی چہارم سے دورۂ حدیث تک طلبہ کو عربی بول چال، اظہارِ خیال اور تقریر و مکالمہ کی عملی مشق کرائی جاتی ہے تاکہ وہ بین الاقوامی سطح پر اسلامی علوم کے ترجمان بن سکیں۔ اسی طرح جداری پرچوں کا اہتمام کیا جاتا ہے، جن میں طلبہ اپنے علمی، ادبی اور اصلاحی مضامین عربی، اردو اور ہندی میں لکھ کر آویزاں کرتے ہیں، جس سے ان کی فکری وتحریری صلاحیتیں پروان چڑھتی ہیں۔ علاوہ ازیں، خوشخطی کی باقاعدہ تعلیم دی جاتی ہے تاکہ طلبہ فنِ کتابت میں مہارت حاصل کریں۔ ہر بدھ کو اساتذۂ کرام کے علمی و تربیتی محاضرہ جات منعقد ہوتے ہیں جن سے طلبہ علمی و فکری طور پر مزید سنورتے ہیں۔ یہ شعبہ جامعہ کی ہمہ جہت تربیت کا ایک مضبوط ستون ہے۔