مختلف شعبہ جات

کسی بھی ادارے کی تعلیمی و تعمیری سرگرمیوں اور منصوبوں کی تکمیل مالی وسائل کے بغیر ممکن نہیں۔ اسی لیے مالیات کی فراہمی اور غلہ جات وغیرہ کی وصولیابی کے لئے منظم نظام قائم کرنا نہایت ضروری ہے۔ جامعہ میں اس شعبہ کی ذمہ داری یہ ہے کہ آمدنی کے ذرائع کو مستحکم بنایا جائے اور تکثیرِ چندہ کے لئے مؤثر حکمت عملی اختیار کی جائے۔ ما ہِ رمضان المبارک اور دیگر اوقات میں سفراء کو مختلف علاقوں میں روانہ کرنا، معاونین و محسنین سے رابطہ قائم رکھنا، اور عطیات کو امانت و دیانت کے ساتھ جامعہ تک پہنچانا اسی شعبہ کے بنیادی فرائض ہیں۔ کسی بھی ادارہ کی ترقی میں یہ شعبہ کلیدی حیثیت رکھتا ہے، کیونکہ تعلیم و تربیت کا سلسلہ اسی وقت کامیابی سے جاری رہ سکتا ہے جب اس کے مالی وسائل مستقل اور قابلِ اعتماد ہوں۔ الحمدللہ! جامعہ میں اس شعبہ کو ہمیشہ خاص اہمیت دی گئی ہے تاکہ ادارے کی خدمت اور ترقی میں کوئی رکاوٹ نہ آئے۔

یہ حقیقت کسی سے پوشیدہ نہیں کہ علمِ دین کا حاصل کرنا ہر مسلمان پر فرض ہے۔ لیکن اس کے ساتھ یہ بھی لازم ہے کہ حاصل شدہ علم پر خود عمل کیا جائے اور دوسروں تک اس کی تبلیغ کی جائے۔ علمائے کرام کا منصبی فریضہ ہے کہ وہ علومِ نبویہ کی اشاعت کریں، اور امت مسلمہ کی اجتماعی ذمہ داری ہے کہ امر بالمعروف اور نہی عن المنکر کو زندہ رکھیں۔ رسول اکرم ﷺ نے ارشاد فرمایا: "بَلِّغُوا عَنِّی وَلَوْ آیَۃً" یعنی میرا پیغام پہنچاؤ خواہ ایک ہی آیت کیوں نہ ہو۔ اسی ہدایت کی روشنی میں جامعہ نے ایک مستقل شعبہ قائم کیا ہے۔ اس کے تحت طلبہ ہر جمعرات کو ایک معلّم کی امارت میں قریبی پسماندہ بستیوں کا رخ کرتے ہیں، جہاں وہ دینی دعوت و اصلاحی خدمات انجام دیتے ہیں۔ اس تربیت کا مقصد یہ ہے کہ طلبہ کو اپنی منصبی ذمہ داری کا شعور ہو اور وہ اسلام کے پیغام کو دنیا کے کونے کونے تک پہنچانے کا جذبہ اپنے دلوں میں راسخ کریں۔

جامعہ میں بیرونِ مقام کے طلبہ کے لیے ایک مستقل شعبہ قائم ہے جو ان کی رہائش، خوراک اور عمومی نگہداشت کا ذمہ دار ہے۔ اس شعبے کے فعال اور محنتی اساتذہ طلبہ کی ذاتی تربیت، صفائی ستھرائی، نظم و ضبط اور دیکھ بھال پر خصوصی توجہ دیتے ہیں تاکہ وہ ایک پاکیزہ، پُرسکون اور سازگار ماحول میں اپنی تعلیمی، اخلاقی اور عملی سرگرمیاں جاری رکھ سکیں۔ دارالاقامہ کی اپنی مستقل عمارت نہ ہونے کے باوجود جامعہ اپنی استطاعت کے مطابق طلبہ کو ہر ممکن سہولیات فراہم کرتی ہے؛ جن میں شدید گرمی سے بچاؤ کے لیے درس گاہوں میں ڈکٹنگ کے ذریعے ٹھنڈی ہوا کا انتظام، موذی جانوروں و حشرات الارض کے خطرات سے حفاظت کے لیے کھڑکیوں پر حفاظتی جالیاں، اور سردیوں کے موسم میں لحاف و دیگر ضروری سامان کی فراہمی شامل ہے، تاکہ طلبہ تمام تر دشواریوں سے آزاد ہو کر اطمینان اور یکسوئی کے ساتھ تعلیمی و تربیتی مراحل طے کر سکیں۔